تجربتي مع عملية الليزك في مستشفى السيف لطب العيون 👓

أهلًا وسهلًا لكل مهتم بعملية الليزك 👁🏥

راح أنقل لكم تجربتي الي أعتبرها من أكثر اللحظات الي كنت أنتظرها بفارغ الصبر خصوصًا مع عناء دام لـ ١٣ سنة مع النظارة 👓💪🏻.

أولًا: أختيار المستشفى:

أول شيء سويته سمعت تجارب الآخرين خصوصًا في منطقتي " الشرقية- القطيف" وشفت من الأكثر استفاد من بعد العملية وارتاح. وكانت الغلبة والسمعة الطيبة لمستشفى السيف لطب العيون و طبيبها  د.عبدالرزاق آل سيف.

فتوجهت مباشرةً للمستشفى وأني عمري ١٩، سويت الاجراءات المعتادة قبل العملية - الي راح أذكرها تالي-

ولكن تم إقناعي إن ضمان النتايج يثمر إذا سويتها وأنا عشرينية. 🤔👁

ثانيًا: الاجراءات قبل العملية والرسوم 💸💸

الاجراءات المبدئية تنتهي في يوم واحد و ماتحتاج موعد بخلاف العملية الي تصير بس يومين في الاسبوع " الأحد أو الثلاثاء" والي تكون على يد الدكتور عبدالرزاق .

المبلغ الكامل للاجراءات 720 ريال إذا ما عندك ملف و700 ريال لو عندك ملف

وعلى ما أذكر حتكون لك زيارة لخمس اطباء مختلفين أو مساعدين قبل وصولك للطبيب الرئيسي د.عبد الرزاق .

راح يكشفون على نظرك، مستوى شبكية العين، القرنية، كل شيء يتعلق ويساهم في توضيح إذا أنت قادر تسوي العملية أو غير قادر. ومعلومة مهمة جدًا ؛ لازم تكون نايم بحدود السبع ساعات علشان تكون قرنيتك مرتاحة في وقت الفحوصات. والعدسات الاصقة - لو كنت تلبس- توقف عنها لمدة أسبوع. لأن العدسات الاصقة تضغط على عدسة العين وتعطي قراءة خاطئة لطبيب العيون وهالشيء له عواقب وخيمة👁.

مع كل طبيب تدخل له أنصح أنك تسأل عن حال العين علشان تفهم وضع عينك وتكون في الصورة، لا تكتفي برؤية الطبيب يدوّن إلي شافه في ملفك وتسكت👌🏻..

في ختام الاجراءات راح يتحدد لك موعد مع دكتور عبدالرزاق علشان يراجع ملفك ويكشف عليك الكشف الاخير ويتأكد إن العين تنفع معاها عملية الليزك ويعطيك تحذيرات: كـ عدم ارتداء العدسات لحين موعد العملية، عدم وضع مساحيق تجميل على العين. استخدام قطرات مُرطبة عند الحاجة .. الخ

ثالثًا: عملية الليزك 👁⚡️ ..

عملية الليزك للعينين تكلف 7000 ريال

والمبلغ يطلوبنه كاش 💸 - مافهمت ليش هالتعقيد🤔- بس على كلٍ .. جهّز مبلغك كاش قبل وقت العملية بيوم وروح على الوقت بالضبط علشان لا يدخلون شخص قبلك وتنتظره . 👏🏻

العملية وقتها قصصصير جدًا ، المعدل الطبيعي يكون بحدود ١٥ دقيقة لـ ٢٠ دقيقة . يقل الوقت أو يزيد اعتمادًا على شطارة المريض 👌🏻..

شخصيًا 🙈؛ على كلام الدكتور، أخذت وقت أكثر من الازم لأن كنت اتوتر غصبًا عني وأضغط على اسناني و يصير تنفسي بطيء وهالشيء مايعجبه الدكتور لأن يبغاني مسترخية وطبيعية جدًا حتى تكون نتايج العملية أفضل واحسن👌🏻. لذا خذ نفس عميق ولا تتوتر وخلك واثق حتى لا تصير مثلي وتاكل كم تهزيئة حلوة من الطبيب 😂😢.

اثناء العملية ✨:

 راح يكون التخدير موضعي على العين باستخدام القطرات، راح يطلب الدكتور تركيزك معاه وراح يكرر اسمك واجد علشان يشد انتباهك وماتفهي في نص العملية. العملية تنقسم لجزئين، نزع طبقة شفافة من العين " الجزء الي بنظر الدكتور الأصعب والي بنظري كان الاسهل😂" تالي يبدأ بتصحيح الشبكية وراح تسمع صوت قوي وريحة حريقة 😂🔥 .. لكن لا تخاف جدًا طبيعي، بعد هذي المهمة خلاص يبدأ يرطب عينك ويخلص ماتبقى ويروح للعين الثانية ويسوي نفس الشيء👏🏻.

بعد العملية :

راح يطلب منك إن تفتح عينك خفيف وماتجهدها أول الوقت، بيعطيك نظارة شمسية- هيلقية شوي🙄/ سخيفة الشكل-  قطرات مرطبة و وصفة طبية ضروري تمشي عليها حسب مايقولوه لك. تبتعد عن برك السباحة لمدة شهر، تبتعد عن المساحيق لمدة شهر وخصوصًا عند منطقة العين . عدم تعرض العين للماء من الداخل ودعكها . والاهم عدم تعرض العين لأشعة الشمس.

أما بالنسبة لانوار البيت فعادي. و الجوال و التلفاز عادي تشاهد وتمارس حياتك طبيعي.

لكن أول ساعتين لأربع ساعات. بتحس بشعور حرقان بالعين لكن كان مُحتمل وبمجرد ماتنام وتصحى، مابتحس بأي شيء. وبتبدأ تشوف بشكل واضح وطبيعي مع تشوش بسيط لكن مُحتمل .

وبعدها راح تصير عندك كذا موعد مع الدكتور نفسه علشان يطمن من نتائج العملية وراح تكون هذي المواعيد مجانية


👌🏻😍. وبس .. 

ختامًا : 

مضى على عمليتي شهرين والتحسن واضح جدًا، يوم عن يوم يتحسن ويقل التشوش. يعني مع الأيام بيصير أفضل من الآن بأذن الله 😍👌🏻

العملية كلّش بسيطة و سريعة. والاعراض مابعد العملية أقدر اقول لا تُذكر. اللهم أكثر شي عانيت منه هو الجفاف ، بس مع الترطيب كل شيء يرجع مثل الحلاوة 👌🏻

- أتمنى تكلمت بشكل وافي وكافي👌🏻💛